ਹਸ਼ਰ
ਤੇਰੇ ਸ਼ਹਿਰ ਅੰਦਰ
ਸੂਰਜ ਹੁਣ
ਅਛੋਪਲੇ ਜੇ ਨਈਂ
ਚਲਾ ਜਾਂਦਾ
ਰਾਤ ਦੀ ਗੋਦ ਵਿਚ
ਤੇਰੇ ਸ਼ਹਿਰ ਦੀਆਂ
ਕੰਕਰੀਟੀ ਜਗੀਰਾਂ
ਉਸਦੇ ਜਿਸਮ ਨੂੰ
ਝਰੀਟ ਦਿੰਦੀਆਂ ਨੇ
ਪੱਛਿਆ ਹੋਇਆ ਲਹੂ
ਸਿੰਮਿਆ ਪਿੰਡਾ
ਡਿੱਗ ਪੈਂਦਾ ਹੈ
ਧੜੱਮ ਕਰਕੇ
ਕੁਦਰਤ ਦੀ ਕਾਦਰ
ਨੂੰ
ਖਤਮ ਕਰਦਾ ਆਦਮੀ
ਖੁਦ ਮੌਤ ਵੱਲ ਸਰਕ
ਰਿਹਾ ਪਲ ਪਲ
ਪਹਿਲਾਂ ਵਰਗਾ ਕੁਝ
ਵੀ ਤੇ ਨਹੀਂ
ਹੁਣ ਬੰਦਾ ਪਿਆਰ
ਨਾਲ ਨਹੀਂ ਆਂਕਿਆ ਜਾਂਦਾ
ਵਸਤੂ ਉਸਦਾ ਕੱਦ
ਦੱਸਦੀ ਹੈ
ਤੇਰੇ ਸ਼ਹਿਰ ਵਿਚ
ਮੈਂ
ਬੇਗਾਨਾ ਹੀ ਨਹੀਂ
ਪਛਾਣਹੀਣ ਵੀ ਹਾਂ
ਆਪਣੇ ਅਕਾਰ ਨੂੰ
ਖੋਜਦਾ
ਗਵਾਚਿਆ ਹੋਇਆ
ਪਰਛਾਵਾ
ਚਲ ਮੇਰਾ ਹਸ਼ਰ ਤਾਂ
ਏਵੇ ਹੀ ਸੀ
ਪਰ ਤੇਰੇ ਸੁਪਨਿਆਂ
ਦਾ ਅੰਤ ਵੀ
ਕੁਝ ਅਨੋਖਾ ਨਹੀਂ
ਹੋਇਆ
ਹੁਣ ਮੈਂ ਬੇਨਾਮੀ
ਕਬਰ ਹਾਂ
ਤੂੰ ਬੇਚੈਨ
ਆਤਮਾ..............